Pinapurihan at kinilala ni City Mayor Lourdes S. Cataquiz ang Barangay Laram, Sangguniang Barangay at bumubuo ng Lupong Tagapamayapa sa ginanap na Flag raising Ceremony ng Pamahalaang Lungsod noong Oktubre 15, 2018. Pinatunayan ng dating Lupong Tagapamayapa sa pangunguna ni dating kapitan Ruby Adajar at sa pagpapatuloy nina Punong Barangay Edwin Palomar gayundin ang mga bumubuo ng Lupong Tagapamayapa, Kalihim ng Lupon at miyembro ng Lupon ang kanilang dedikasyon at husay sa pagsusulong ng “Katarungang Pambarangay”. Ang Barangay Laram ay nagwagi sa City Level sa San Pedro at nanalo muli sa District Level hanggang sa makamit nito ang “Lupong Tagapamayapa Incentive Award Provincial Category Winner (Component City Category) na iginawad noong Setyembre 20, 2018 sa Adem Event Center, Sta. Cruz, Laguna. Kabilang sa mga sinuri ang kahusayan ng operasyon ng lupon, epektibong pagsasaayos nito ng mga idinudulog na sigalot o alitan sa kanilang tanggapan, pagiging malikhain at mapamaraan, pagkakaroon ng pasilidad, at pagkakaroon ng pinansyal o di-pinansyal na suporta. Ang Lupong Tagapamayapa Incentive Awards ay programa ng Department of the Interior and Local Government (DILG) na naglalayong palakasin ang “Katarungang Pambarangay” nang sa gayon ay agarang maresolba at hindi na maiakyat pa sa mga hukuman ang mga sigalot sa kanilang mga nasasakupan.
Photos by: Joey Castillo
The post BRGY. LARAM NAKAMIT ANG LUPONG TAGAPAMAYAPA INCENTIVE AWARD appeared first on .